Baditugu jada datorren ostegunerako lehen hiru bikote finalista: BASTERRA-URANGA zesta-puntaz jokatzeko, eta eskuz berriz, APEZETXEA-PEÑALVER jubenil mailan eta IGOA-ERLE 23 urtez azpikoetan.
Hauexek emaitzak:
1. Zesta-puntaz, Gonzalo AGIRRE-DEL RIO 1 BASTERRA-URANGA 2
a. Lehen kintzean: 10 eta 12 Basterra eta Urangaren alde
b. Bigarrenean: 12 eta 9 Gonzalo Agirre eta Del Rioren alde, eta
c. Hirugarrenean: 2 eta 5 Basterra eta Urangaren alde
2. Eskuz. AMIANO-ARROITA…………. 5 APEZETXEA-PEÑALVER 22
3. Eskuz, DE LA FUENTE-APEZETXEA 13 IGOA-ERLE……………… 22
Zesta-puntazko partiduaren markagailu ibilbidea:
1. Kintzea: 0-1, 1-1, 1-2, 2-2, 2-3, 3-3, 3-4, 4-4, 4-10, 10-10 eta 10-12 Basterra eta Urangaren alde.
2. Kintzea: 0-1, 2-1, 2-4, 3-4, 3-6, 6-6, 6-7, 7-7, 7-8, 8-8, 8-9 eta 12-9 Gonzalo Agirre eta Del Rioren alde.
3. Kintzea: 0-2, 1-2. 1-3, 2-3 eta 2-5 Basterra eta Urangaren alde
Tantoen banaketa 3 kintzeak batuta:
• Gonzalo AGIRRE: egindakoak 5, galdutakoak 9.
• DEL RIO: egindakoak 5 eta galdutakoak 7.
• BASTERRA: egindakoak 7, galdutakoak 6.
• URANGA: egindakoak 3 eta galdutakoak 8.
Pilotarien jokoari buruz:
• Gonzalo AGIRRE aurrelari zumaiarra. Ez zioen hasiera ona eman partiduari, eta pilota nahiko errazak galdu zituen. Hobetoago aritu zen geroago baina, errematatze garaian ez bazen ere behar bezain fin ibili. Bererik ez zuela eman esango genuke, badu ordea denborarik horretarako, 16 urte bakarrik bai ditu oraindik.
• Julen DEL RIO atzelari gazteiztarra. Hasieran hobeto hau aldiz, sendo jokatuz eta tantoak ere eginaz. Bigarren kintzetik aurrera gehiago galdu zuen eta tanto gutxiago eginere bai. Nolanahi ere agerian utzi zituen bere pilotari zantzuak.
• Julen BASTERRA aurrelari hondarrabitarra. Beralaukoteko erregularrena, eta lortutako zenbakiak ere horrela diote, tantorik gehien egin zuena bera, eta gutxien galdutakoa ere bai. Beste mundukorik egin gabe, baina ondo eta serio jokatuz gainditu zuen norgehiagoka.
• Unai URANGA. Atzelari zumaiarrak behetik gora egin zuen partiduan zehar. Lehen kintzean bost pilota galdu zituen, bigarrengoan hiru eta azkenengoan bat bera ere ez. Pilotakada ederrak jo zituen, eta 3 tanto egin ere bai..
Eskuzko jubenil mailako partiduaren markagailuibilbidea:0-10, 1-10, 1-15, 2-15, 2-16, 3-16, 3-19, 5-19 eta 5-22 Apezetxea eta Peñalverren alde.
Tantoen banaketa:
• AMIANO: egindakoak 2 eta galdutakoak 5.
• ARROITA: egindakorik ez eta galdutakoak 4.
• APEZETXEA: egindakoak 11 eta galdutakoa bakarra.
• PEÑALVER: egindakoak 2 eta galdutakoak beste 2.
Pilotarien jokoari buruz:
• Unai AMIANO. Hotz irundarra atzo. Atzeko koadroetan desabantaila nabaria izan bazuen ere, ez zuen jakin izan aurre egiten gerriko urdindunen joko erauntsiari: atzelariak agindu eta aurrelarik tantoak pilatu hain zuzen ere, eta di-da batean hamar eta hutsa galtzen jarri ziren. Orduan sakea hartu eta zerbait egiteko esperantzak, baina ordura arteko traza bera partiduak, hamabosteraino igo zelarik markagailu urdina azkar batean. Eta dinamika horretan norgehiagoka amaitu arte. Pilotakada ederrik jo zuen baina, eta pare bat tanto gustagarri egin ere bai.
• Ander ARROITA. Arrigorriagako atzelariari buruz ezin aipamen onik egin. Ezkerrez bezala eskuinez daki jotzen pilotari, baina ez dio kolperik eransten. “Buena” asko egiten du, baina eman gutxi, eta horrela ezin behartu aurkariak. Badu zer eginik hobetu dadin arlo honetan, eta poztuko ginateke horrela balitz datozen urteei begira..
• Beñat APEZETXEA. Aitzurin egon ez zenak ere antzemango luke ondo jokatu zuela bere zenbakiak ikusi bezain laster, eta horrelaxe da. Egia esanda bikote lagun Peñalverrek ere izan zuen zer ikusia norgehiagoka hainbesteko diferentziaz irabazteko, baina Beñat Apezetxeak ondo baino hobeto egin zituen bere lanak, perfekziotik gertu ibili zen: sakatu, defenditu, errematatu, bikote lagunari pilota onak utzi ere bai, eta horrela tantoak bata bestearen atzetik markagailura igoarazi. Era guztietako erremateak egiteko gai da, zortzi postura ezberdinetan hamaika tanto egin zituen atzo, eta bakarra galdu. Oso pilotaria da, zalantza izpirik gabe, goizuetar gaztetxo hau eta, erakutsitakoari so, txapelak soinean ondo emango lioken horietako bat.
• Jonan PEÑALVER. Partidu bikaina jokatu zuen atzelari tafallatarrak. Asko eman zion pilotari, ez bikote lagun Apezetxeak airez jotzeko keinua egin eta berak jotzeko pilota frankoetan bakarrik , atzeragotik ere bai, berehala pasatuz tantoa dominatzera. Goitik behera edo luzetara pilota jotzeko airezko bolea ona du, eta ez da erraza bera gainditzea bestalde. Bere buruarekin seguru zegoenaren traza eman genion atzo ere eta. ikusi egin beharko den arren azken langa gainditzeko nola moldatzen den, berarekin konfiantza izateko adina erakutsi du.
Eskuzko 23 urtez azpiko partiduaren markagailu ibilbidea:0-1, 2-1, 2-4, 3-4, 3-5, 9-5, 9-12, 10-12, 10-13, 11-13, 11-18, 12-18, 12-19, 13-19 eta 13-22 Igoa eta Erleren alde.
Tantoen banaketa:
• DE LA FUENTE: egindakoak 4 eta galdutakoak 6.
• APEZETXEA: egindakoak2 eta galdutakoak 6.
• IGOA: egindakoak 8, eta galdutakoak 3
• ERLE: egindakoak 2 eta galdutakoak 4.
Pilotarien jokoari buruz:
• Aingeru DE LA FUENTE. Ez zuen gaizki jokatu Eugiko pilotariak, baina zerbait falta partidua irabazteko. Ofizio handiarekin jokatuz pilotan hori bai, saketik hasi eta zintzo-demonio dituen indar guztiekin saiatuz, aurkariak tantoa egin ez dezan bezala, norberak egiteko orduan ere, baina lehenengo zer eginean ondo moldatzen den bezala,bigarrengoan ez hainbeste, juxtu samar, zenbait pilotetara errematean sartzeko beldurrez batzuetan, eta beste batzuetan berriz min gutxitxo eginaz bere errematearekin.
• Antton APEZETXEA. Partidu ona jokatu zuela esan behar goizuetarrak. Hasiera oso ona eman zion, bi eskurekin pilota gozatu eta atzeraka bidaliaz. Trote handian ibili zen, atzeraka pilota bila joan eta ondo ekarriaz bueltan batzuetan, eta aurrelari bikote lagunaren bizkar zain lanak eginaz ere bai ondo baino hobeto, baina partidu erditik aurrera gauzak aldatzen hasi ziren pixka bat, eta bederatzi eta bost aurretik joatetik, bederatzi eta hamabi galtzera pasa ziren De La Fuente eta biak. Eta norgehiagokaren azken zatian bere errendimenduak behera egin zuen, eta galtza bete lan aurkarien jokoari eusteko.
• Josu IGOA izan zen laukoteko onena. Diferentzi nabarmenarekin tantorik gehien berak egin zuen, eta gutxiena galdu ere bai. Bera izan zen garaipen bidean gehien asmatu zuena, gurdi pertikari gogor eutsiaz bidetik atera ez zedin zenbait garaitan, eta abiada hartu eta lokatz gunetatik gelditu gabe pasatuz bestetan. Behetik goraka joanda etxarri-aranaztarraren jokoa aurtengo txapelketan, eta hiru partidu jokatu ondoren merezimendu osoz iritsi da finalera.
• Iñigo ERLE. Ondo oñatiarra ere. Partiduko lehen zatian, aurkariak pilota aldatu ondoren izan zituen arazorik handienak partiduari eusten, De La Fuentek eskuinera ateratako sake zitalei erantzuten bezala, beste zenbait pilotara ondo jarri ezinik. Denetara lau pilota izan ziren galdutakoak baina, eta beste birekin beste hainbeste tanto egin ere bai ordea. Ez da pilotari distiratsu horietakoa, baina indar askoko mutila, eta bera gainditzea ez da erraza. Jon Lazkozen ordezko bezala etorri eta bi partidu on jokatuondoren finalera iritsi. Bada zerbait alajaina.
Datorren astelehenean, abuztuak 22an, final aurrekoetako bigarren jardunaldia. Hauxe egitaraua:
1. Zesta puntaz: Cosme AGIRRE-MANTZISIDOR / Eduardo AGIRRE-IBARLUZEA
2. Eskuz gazte-jubenilak..: ARANBARRI-BERNAOLA /SASIAIN-GABIRONDO
3. Eskuz 23 urtez azpikoak: MATA-IBARLOZA / IRRIBARRIA-ODRIOZOLA